Petronorrek hainbat neurri hartzeko asmoa azaldu dio enpresa-batzordeari, hauen artean sinatutako akordioak ez betetzearena. Egoera horren aurrean, neurriak hartzea beste aukerarik ez dugu.

Petronorreko zuzendaritzak enpresa-batzordeari jakinarazi dio zenbait neurri ezarri nahi dituela negozioaren bideragarritasunari begira. Neurriok, besteak beste, eragina daukate 2020ko greba bertan behera utzi ostean lortu ziren akordioetan, zeinetan jaso baitzen 75 pertsona prestatzea eta  kontratatzea.

Akordio horiei esker enplegua sortzen zen, lana eta bizitza pertsonala uztartzea hobetzeko eta ordu estrak gutxitzeko. Oraingoan, zuzendaritzak plantilla murriztea jarri du mahai gainean, nahiz eta jendaurrean milioi askotako inbertsioak eta lanpostuen sorrera iragarri duen.

Bakarrik 25 kontratazio, ERTE...

2020ko urtarrilean adostu ziren kontratazioetatik 25 baino ez dira egin, eta maiatzean bukatuko dira denak. Orain, kaleratzearen mehatxua dago mahai gainean. Era berean, beste 17 pertsonen prestakuntza bertan behera utzi da eta ez da bete, beraz, Planta Kimikoko Operatzaile izateko ikastaroa egin ondoren pertsona horiek kontratatzeko konpromisoa. Gainerako 33 pertsonentzako plataforma duala sortzea  ere bertan behera geratu da, nahiz eta itunean aurreikusten zen 2020ko urrirako prestakuntza ematea eta kontratatzea, plantillaren egungo egoerak sortutako beharrizana zela-eta.

Ekoizpeneko kolektiboan, 2020. urtean, 16.437 ezohiko ordu egin dira, gehienak derrigorrez bete beharrekoak. 2019an, berriz, 47.180 izan ziren eta 2018an 20.587. Ordu estrak murriztea aurreikusitako kontratazioen bidez funtsezkoa da langileen kontziliazioa, instalazioen segurtasuna eta ingurumenaren babesa bermatzeko.

Zuzendaritzaren neurrien artean badira ERTE bat egitea eta arauak malgutzea, bai eta akordioak ez betetzea eta enplegua suntsitzea dakarten beste batzuk. Batzordeak konpainiako presidenteari adierazi dio ez dagoela ados neurri horiek aplikatzearekin, eta salatu du hartutako konpromisoekin zuzendaritzak izan duen errespetu falta.

Akordioen betetzea

Egoera horren aurrean ez dugu beste aukerarik ekitea baino; exijitzen dugu hitzarmen kolektiboa eta sinatutako akordioak bete daitezela. Astearte honetan mobilizazioekin hasiko gara, zuzendaritzak bere konpromisoak bete ditzan. Hala, elkarretaratze bat egingo dugu findegiaren sarreran 13:30etik 15:30era. Elkarretaratzeak iraun bitartean batzar bat egingo da aurrerantzean garatuko dugun ekintza-plana onartzeko.