Patronalaren proposamen urrien eta instituzioen inplikazio faltaren aurrean, Arabako esku-hartze sozialerako hitzarmenduin baten aldeko borrokak aurrera jarraitu du asteburu honetan kanpaldi eta manifestazio arrakastatsuekin.

« Katalunian Generalitateak egin badu,  Araban ere egin daiteke  »

Asteburu honetan hainbat ekintza eta mobilizazio egin dituzte esku-hartze sozialeko langileek zaintza-sistema publiko baten eta sektore publikokoen lan-baldintzekin ekiparaziorako bidean lan-baldintzak hobetuko dituen hitzarmen baten alde.

Mobilizazioak

Ostiral arratsaldean, Gasteizen ekaitz handia izan zen arren, ehun langile inguru bildu ziren herritarrei euren lan-egoeraren berri emateko eta hainbat ekintza prestatzeko.

Gauean, 30 pertsonak baino gehiagok egin dute lo Plaza Berrian, eta agerian utzi dute sektoreko langileak, beren lan-baldintzengatik ez ezik, zaintza-sistema publiko baten aldeko borrokan ari direla. Sistema horrek arreta egokia eta behar adina zerbitzu eta zentro bermatuko behar dituena, azken hamarkadetan langile-klasearen pobretzeak eta gure lurraldean milaka pertsona gizarte-bazterkeriara eta babesgabetasunera bultzatzen dituen sistema kapitalista heteropatriarkal bidegabe eta basati baten ondorioek eragindako gizarte-premia gero eta handiagoei erantzuteko.

Ondoren, komunikabideei eman zaie arreta gosari batean, non gatazkaren nondik norakoak eta sektorearen aldarrikapenak azaldu diren, eta, 12:00etan, manifestazio handi batek Gasteizko erdigunea zeharkatu du, Plaza Berria eta Probintzia Plaza elkartuz. Manifestazio horretan, sektoreko langileek zaintza sistemaren egoerarekin eta gizarte zerbitzu guztiekin kezkatuta dauden hainbat gizarte eragileen babesa jaso dute: Arabako Pentsionistak Lanean, Zaintza Araba, Gasteizko Mugimendu Feminista, Gasteizko Bilgune Feminista, Arabako Denon Bizitzak Erdigunean, Emakumeok Gerraren Aurka-Mujeres contra la Guerra, Errota Zaharra Auzo Elkartea eta Judimendikoak Auzo Elkartea, besteak beste.

Patronalak eta instituzioek sektoreko mobilizazioak geldiarazteko duten asmoaren aurrean, sektoreko langileek erakutsi dute ez dutela lortuko hasitako bidea gelditzea eta beren bidezko aldarrikapenak tinko defendatzen jarraituko dutela argi geratu da.

Ez patronala, ezta erakundeak ere

Joan den apirilaren 30ean, negoziazio-mahaiak beste bilera bat egin zuen, eta AISA patronalak %2,5eko igoera proposatu zuen 2025erako, atzeraeraginez, horrek ez du erosteko ahalmenari eustea bermatzen, 2024ko KPIa % 3,6koa izan baitzen. Bileran, sindikatuok konpromisoa hartu genuen beste negoziazio-proposamen bat bidaltzeko, patronalak bere puntu guztietan erantzuna jasotzeko datorren maiatzaren 19ko hurrengo negoziazio-bileran. Aukera berri bat izango da erantzukizunez jokatzeko eta behingoz langileen proposamenak entzuteko.

Asteazken honetan, Gorka Urtaran Gizarte Politiketako diputatuak profilez jarri zen berriro eta baloiak kanpora bota zituen, sektoreko langileek 4 urtetan %11ko igoerarekin konformatu behar dutela planteatuz, eta hori guztiz onartezina da. Haren aitzakiak eta gezurrak agerian geratu ziren hurrengo egunean, Kataluniako Generalitateak akordio bat onartu zuenean gizarte-sektorean 4 urtean %40 inguruko soldata-igoerekin, sektore publikoko baldintzen ekiparazioa bermatzeko, Araban sektorean presentzia duten sindikatuek planteatutakoa baino igoera handiagoak, eta planteatutakoaren helburu bera, ekiparazioa, alegia. Nahi bada, posible da, zalantzarik gabe!

Bidezkoa eta posiblea

Badakigu eskatzen duguna bidezkoa dela eta, gainera, posible dela, eta ez gara geldituko esku-hartze sozialeko langileek egiten duten lan profesional eta funtsezkoa merezi duen hitzarmena lortu arte eta gizarte-premia guztiei erantzuteko baliabide sozial egokiak eta nahikoak dituen zaintza-sistema publiko baterantz aurrera egin arte.

ELA - LAB - CCOO - ESK