Eusko Jaurlaritzak askoz jarrera ausartagoa, sendoagoa eta enpleguaren eta industriaren defentsarekin benetan konprometitua hartu behar du. Ezin da onartu milioika diru publiko xahutu dituen enpresa-zuzendaritza batek erabateko inpunitatez jokatzen jarraitzea.

« Eusko Jaurlaritzaren ekidistantziak kudeaketa txarraren  ondorioak beti langile klasearen gain  erortzen diren eredua betikotzen du »

Atzoko bileran, apirilaren 8an, Tubos Reunidoseko langileen ordezkari sindikalok bilera egin genuen Lakuan Lan eta Gizarte Segurantzako sailburuordearekin, enpresako Zuzendaritzak planteatutako EEE prozesuak eragindako kezka eta haserre handiak baldintzatutako testuinguruan.

Bilera horretan, sindikatuok erabateko argitasunez azaldu genuen prozesu osoan zehar egon den erabateko gardentasun falta, baita Zuzendaritzak alegatutako arrazoien justifikazio sendo eta egiaztagarririk eza ere.

Harridura

Izan ere, Laneko sailburuordeak berak harriduraz erreakzionatu zuen alde sozialetik enpresak egindako irregulartasun ugariak azaldu zirenean, bai egoera ekonomiko hau sortu duen kudeaketan, bai negoziazio prozesuan bertan, baita EEEaren arrazoien justifikazio ez fidagarrian ere.

Halaber, salatu dugu Tubos Reunidoseko Zuzendaritzak ez duela inolaz ere negoziatzeko borondaterik erakutsi. Hasieratik jarrera aldaezina izan du: kaleratzeak gauzatzea, logistika kanporatzea eta altzairutegia ixtea, enplegua eta plantaren etorkizun industriala bermatuko lituzketen alternatibak mahai gainean jarri gabe. Jarrera honek agerian uzten du aurrez pentsatutako estrategia bat dela, benetako negoziazio prozesuarekin zerikusirik ez duena.

Eusko Jaurlaritzak beste aldera begiratzea erabaki du

Egoera honen aurrean, Eusko Jaurlaritzari exijitu diogu bere jarrera pasiboa alde batera uzteko eta enpresako Zuzendaritzaren aurrean irmo jarduteko, gaur egungo egoera larriaren erantzule nagusia baita. Ez da onargarria, urteetako kudeaketa zalantzagarria egin ondoren eta diru publiko kopuru handiak jaso ostean, enpresak ondorioak soilik langileen gain uztea. Beste behin ere, Eusko Jaurlaritzak beste aldera begiratzea erabaki du, plantilla osoarentzat bidezkoa eta bideragarria izango den irtenbide baterako neurri zehatzik aurkeztu gabe.

Kezkagarria da, Zuzendaritzari erantzukizunak eskatzea saihesten den bitartean, Eusko Jaurlaritzak bere burua bitartekari gisa eskaintzeko prest agertu izana soilik Amurrioko plantako greba mugagabearekin bukatzeko. Alde sozialetik argi utzi nahi dugu greba ez dela arazoa, baizik eta enpresak hartutako erabaki bidegabe eta aldebakarren ondorio zuzena. Grebaren amaiera EEEa kentzen denean eta benetako negoziazio prozesu bat irekitzen denean bakarrik etorriko da, mehatxurik eta inposatutako baldintzarik gabe.

Bidegabeko ekidistantzia

ESK sindikatutik uste dugu ezinbestekoa dela Eusko Jaurlaritzak enpleguaren eta industriaren defentsan askoz jarrera ausartagoa, irmoagoa eta konprometituagoa hartzea. Ezin da onartu milioika euroko diru publikoa xahutu duen enpresa zuzendaritza batek inpunitate osoz jardutea. Beste aldera begiratzeari uzteko garaia da.

Beste behin ere, kezkaz ikusten dugu Eusko Jaurlaritza greban jartzen ari dela fokua, krisi hau eragin dutenen erantzukizunak exijitu beharrean. Ekidistantzia horrek ez ezik, bidegabea izateaz gain, kudeaketa txarraren ondorioak beti langile klasearen gain erortzen diren eredua betikotzen laguntzen du.