CARMEko langileek erakunde ugariren babesa jaso dute eta Gorka Urtaran diputatuari eskatu diote bere akatsa onartzea eta beharrezko aldaketak proposatzea langile guztien enplegua eta zerbitzua behar bezala ematea bermatzeko.

« Ez da aurrekontu-arazoa,  borondate politikoarena  baizik »

Joan den maiatzaren 31n argitaratu zen indarkeria matxistaren biktimentzako eta haien ardurapeko pertsonentzako egonaldi ertaineko arreta-zentroaren (CARME) lizitazioa berritzeko plegua, gaur egun Xilema Fundazioak kudeatzen duena eta Gizarte Ongizaterako Foru Erakundearen (GOFE) mendekoa dena.

Une horretatik aurrera, langileek etengabe salatu dute zerbitzuaren kontratazio-agiri berriak ekarriko duen langile-murrizketa basatia, eta, horrekin batera, orain arte egin den arretaren narriadura.

Murrizketak

CARME 2020an ireki zen, 4 emakumerentzako eta haien familientzat, eta 2023an 7 emakumerentzako eta bere ardurapeko pertsonentzat arreta emateko handitu zen. Hau gutxieneko araudia betetzen ez zuen kokaleku batean egin zen, oinarrizko azpiegiturarik gabe. GOFEk 2024an ezarritako aldi baterako irtenbidea artatutako familia-unitateen kopurua murriztea izan zen, 6 familietan utziz, plaza-kopurua handitzea justifikatzen zuen eskaera handia izan arren. Lizitazio berrian, ez dute galdutako plaza berreskuratu, nahiz eta egungo eskariaren eta okupazioaren aurrean guztiz eskasak izan.

Behin eta berriz salatu dugunez, lizitazio berrian %30 murriztu da aurrekontua 2025. urterako Batzar Nagusietan onartutakoaren aldean, eta horrek 7 langile kaleratzea eragingo luke, plantillaren %38, zerbitzua erabat prekarizatuta eta kalitatezko laguntza emateko aukerarik gabe utziz.

Urtaran-ek ez du erantzuten

GOFEk egindako zentzugabekeria azaltzeko eta zerbitzua artatutako emakumeek merezi duten kalitatearekin ematen jarraitzeko ezintasuna planteatzeko, joan den ekainaren 5ean, Urtaran jaunarekin bilera bat egiteko eskatu genuen. Gaur egun, erantzunik gabe jarraitzen dugu. Badirudi gauza garrantzitsuagoak dituela egiteko, eta hilabete batean ez duela tarterik izan langileekin biltzeko eta haien argudioak eta lizitazio-baldintza berriek eragiten dieten egoeraren azalpena entzuteko.

Pleguari errekurtsoa

ESK sindikatuak kontratazio-errekurtso berezi bat aurkeztu zuen ekainaren 20an, kontratazio-agiria bertan behera uzteko eta baliogabetzeko eskatuz, ez baitu bermatzen enpleguari eta plantillaren lan-baldintzei eustea. Astelehen honetan, ekainaren 30ean, OAFRCek (Kontratuen inguruko Errekurtsoen Foru Organo Administratiboa) lizitazioa eten duela jakinarazten duen jakinarazpena jaso da, ESK-k aurkeztutako errekurtsoa ebatzi arte.

Lizitazioa eten ondoren, GOFEk arduratsua izan behar du, bere akatsa onartu eta zentroko langile guztien enplegua eta zerbitzua behar bezala ematea bermatzeko beharrezkoak diren aldaketak proposatu behar ditu, ez baita aurrekontu-arazoa, borondate politikokoa baizik.

Babes sozial zabala

Gaur, Gorka Urtaran diputatuak txapuza horri buruzko azalpenak eman beharko ditu, eta zentroko langileok plazan mobilizatzea beste erremediorik ez dugu izan. Gainera, hogei bat eragile sozial, sindikal eta feministek lagunduta. Eskerrak eman nahi dizkiegu ESK, ELA, LAB, CCOO eta STEILAS sindikatuei, GOFEko Langileen Batzordeari eta Gasteizko Mugimendu Feministari, Emakumeok Gerraren Aurkari, Pentsionistak Arabari (Arabako Pentsionistak Lanean eta Bizitza Duin Baten Alde), Sorgineneari, Itaia Gasteizi, Mugarik Gaberi, Argilan-ESKri eta Errota Zaharra Auzo Elkarteari. Ibilbide honetan, Xilema Fundazioak Araban kudeatzen dituen beste zentroetako lankideak ere gurekin daude hasieratik eta izugarri eskertzen dugu.

Langileek oso eskertuta gaude jasotzen ari dugun babesagatik, eta argi dugu hau lehen urratsa baino ez dela arreta plaza gehiago lortzeko, kalitatezkoak, plantilla nahikoak dituztenak eta indarkeria matxistaren biktima guztiei merezi duten bezalako arreta emateko baliabideekin.

Indarkeria matxistaren aurkako benetako konpromisoaren alde, ez ditugu murrizketak, hipokrisia eta diskurtso hutsak onartuko!