Arabako okindegien hitzarmenaren indarraldia amaitu zenetik 6 urte baino gehiago igaro ondoren, azkenean negoziazioari ekin zaio berriro. Sektorearen parte-hartzearekin eta mobilizazioarekin, hitzarmen duin bat lortuko dugu.

« ELAk eta ESK-k La Vitorianako lantegiaren  ereduari jarraitzea  adostu dugu lan hobekuntzak lortzeko »

2020ko urtarrilaren 10ean, CCOOk aurreakordio bat lortu zuen patronalarekin 2021era arte indarrean egongo zen hitzarmen baterako. Hitzarmen hori ez zen inoiz argitaratu ALHAOn, inork horren zergatia jakin gabe, eta, beraz, ez zen inoiz aplikatu.

CCOOren gelditasunaren aurrean, ELA eta ESK sindikatuok negoziazio-mahaia suspertzea erabaki genuen, eta hainbat oztopo burokratikoren ondoren, helburu hori lortu da, gaur egun bi negoziazio-bilera egin baitira: lehena, otsailaren 9an, eta bigarrena, aurtengo martxoaren 13an.

Mahaia suspertze horretan, CCOOk eutsi egin dio sektorean duela 6 urte zegoen ordezkagarritasunari (% 60 CCOOk, %20 ELAk, %20 UGTk), egungo ordezkagarritasuna onartu beharrean (%40 ELAk, %40 CCOOk eta %20 ESKk).

ELAk, UGTk eta ESK-k CCOOen jarrera ontzat ematea erabaki dugu, sektoreko lan-baldintzak nabarmen hobetuko dituzten edukiekin ekin behar zaion negoziazio bat atzeratzen ez jarraitzeko.

Patronalaren proposamena

CCOOk 2020ko aurreakordioan adostutakoa sinatzeko asmoa adierazi zuen lehen bileran, egungo egoeran erabat ulertezina dena.

Joan den asteazkeneko bileran, SEA patronalak negoziazio-proposamen bat ekarri zuen, 3 urteko indarraldirako hitzarmen bat (2023-2025), soldata-proposamen bat soilik jasotzen duena, hitzarmenaren beste gairi heldu gabe.

Eskaintza 2017ko soldata-taulak %5,45ean eguneratzean eta soldata-igoeraren planteamendu honetan datza:
    • 2023: %4 (2023ko urtarrilaren 1etik aurrerako atzerapenak ordainduta)
    • 2024: %3
    • 2025: %3
    Azkenik, 2026an 2023-2025 KPIen eta eskaintzan planteatutako %10aren arteko aldea aplikatzea planteatu du.

« Ez dugu onartuko  langileek kontuan hartu gabeko akordio  berri bat »

La Vitoriana-ko adibidea jarraitu

Eskaintza horren aurrean, CCOOk duela 4 urte baino gehiago hitzarmen kolektibo gisa lortutako aurreakordioa sinatzea proposatu zuen berriro, eta gainerako sindikatuek adierazi genuen eskaintza aztertu eta hurrengo bileran erantzungo genuela, apirilaren 8an.

ELAk eta ESK-k Arabako okindegien hitzarmen duin baten alde borrokatzeko bidea elkarrekin egitea adostu dugu, La Vitorianako lantegian lan-hobekuntza garrantzitsuak jaso dituen itun baten aldeko borrokan egin genuen bezala.

2023aren amaieran eta 2024aren hasieran egindako borrokak, CCOO erabat kanpoan egon zenak, nahiz eta enpresan ordezkaritza izan, zalantzarik gabe desblokeatu du Arabako okindegien hitzarmenaren negoziazioa.

Ezkutuko akordiorik ez dugu onartuko

Horregatik, ez dugu onartuko CCOOk eta SEA patronalak sektoreko langileek kontuan hartu gabeko akordio berri bat lortzea, eta negoziazioan parte hartzea sektore osoari irekiko diogu, behin egungo egoera aztertu eta negoziazio-mahaian helarazi beharreko edukien proposamen bat adosten dugunean.

Ez dugu zalantzarik sektorearen parte-hartzearekin eta mobilizazioarekin Arabako okindegien hitzarmen duin bat lortuko dugula.