ESK sindikatuak datorren urtarrilaren 9an, beste behin ere, Sare Herritarrak euskal presoen eskubideen alde antolaturiko mobilizazioekin bat egiten du.

Aurten mobilizazio eredu berria izango dugu; Bilbo eta Baionako manifestazio erraldoien ordez mobilizazio aunitz burutuko dira herri eta auzoetan arratsaldeko 17:30tan. Hau, zoritxarrez, berria izango den gauza bakarra izango da. Aldarrikapenak, berriz, zaharrak direlako

Presoen lokarria askatu

Bakea, elkarbizitza eta konponbidea lortzeko ezinbestekoa da behingoz presoen korapiloa askatzea. Onartezina da sufrimendua baino ez eragiten duen politika penitentziarioak gaur egun mantentzea. Azken aldi honetan, hainbat hurbilketen berri izan dugu. Hurbilketa hauetaz pozten baldin bagara ere, batez ere presoen familia eta lagunentzako suposatzen duenagatik, ESK-k salatzen du hauek nahikoak ez izateaz gain, “hurbilketak” ez direla etxeratzeak, euskal presoak Euskal Herrian egon beharko lirateke, giza eskubideak errespetatuak izan daitezen.

Guztiok bizi ari garen osasun krisialdia gogorra bezain mingarria izan baldin bada ere egoera askoz okerragoa izan da preso eta hauen senide eta lagunentzako, etxetik urrun, hainbat hilabete bisitarik gabe, horietako askok maite dituzten horiek besarkatu ezinik… Lagun eta senide guztiek pairatu baldin badute egoera hau, dudarik gabe, kaltetuenak txikienak izan dira, askok pasadan urteko martxotik haien gurasoak muxukatu gabe daudelarik.

Pausu ausartiagoak

Pausuak ematen ari baldin badira ere guk argi dugu Madril zein Parisek ausardi gehiagorekin jokatu behar dutela egoera honetatik irtetzeko. Lehen bait lehen 70 urtetik gorako presoak kaleratu behar dira, baita gaixotasun larriak dituztenak, graduen progresioa errealitatea izan behar da, Frantzian betetako zigorren gehitzea eta berehala Euskal Presoak Euskal Herritaratzea ezin bestekoak dira behingoz eszepzioan eta mendekuan oinarritutako politikekin bukatzeko.

Giza eskubideak aitzakirik gabe errespetatu behar dira, baita presoenak ere; beti diogun bezala eskubide guztiak, pertsona guztientzat, eta, hau gauzatzeko, gu ere bidea izan nahi dugu, bidea gara.