ESK sindikatuak salatu nahi du Zuzendaritzaren, eta bereziki Prestakuntza sailaren, jarrera onartezina, uztailean espezialitatea amaitzen duten mediku egoiliarrekiko.

Jaso ahal izan dugun informazioaren arabera, mediku egoiliar batzuei prestakuntza ukatu zaie, bai eta Emergentziak zerbitzuan sartzeko aukera ere, plantilla osatuta dagoela eta mediku gehiago behar ez direla argudiatuz.

Era berean, profesional horietako batzuek jaso dituzten presioak eta mehatxuak salatzen ditugu; izan ere, urrian prestakuntza jasotzeko aukera izan nahi badute, zentro koordinatzailean guardiak egiteko betebeharra ezarri zaie. Egoera hori guztiz onartezina dela uste dugu.

Argi dago Osakidetzako Emergentziak Zerbitzuaren egituraketa ez dela egokia. Gaur egun ere, langileek autokontzertazio sistemaren bidez bete behar dituzte txandak; horietako asko oraindik estali gabe daude, eta zenbait txanda estali gabe geratzen ari dira.

Iazko udan egoera kritikoa izan zen: 100 txanda baino gehiago estali gabe geratu ziren, Zuzendaritzak profesionalik ez zegoela adieraziz. Aurten, aldiz, badago medikuak kontratatzeko aukera, baina, tamalez, zuzendaritzat aukera hau alferrik galtzen ari da.

Ezin da onartu kudeaketa negargarri hau ezta langileen gutxiespena ere. Zerbitzua benetan hobetu nahi bada, ezinbestekoa da kudeaketa eredua sakonki berrikustea, eta horrekin batera, zerbitzua zuzentzen duten pertsonak aldatzea ere.