Osakidetzaren egoera kaskarra ez da kasualitatea, ezta fenomeno meteorologikoa ere. EAJ-k eta PSE-k helburu zehatz batekin aurrera eraman dituzten politika neoliberalen urteen ondorio zuzena da; osasungintza publikoa degradatzea pribatizazioa justifikatzeko, eta poltsiko lagunei eta osasun pribatuari mesede egitea.

---

"ESKn ez dugu zalantzarik, gure tokia kalean dago, borrokan, Osasungintza Publiko sendo eta duina defendatzen. Erabakiak hartzeko gaitasuna, autonomia, aurrekontua eta behar adina langile dituen Lehen Arreta defendatzen"

---

Horregatik, ESK-n argi daukagu. Otsailaren 25ean gure lekua Bilbo, Gasteiz eta Donostiako kaleak betetzen egongo da gure Osasun Zerbitzu Publikoa defendatzen. Etorkizuna Osakidetza indartsuarekin eta kalitatezko Lehen Arretarekin baino ez dugu ulertzen. Eta hori kalean tinko borrokatuz lortuko dugu, ez dago beste biderik.

ESK-n argi daukagu, Osakidetzako langileak garelako. Lan-baldintzen narriadura egunero jasaten dugulako. Izan ere, EPEen kudeaketa negargarria da, eta nazkatzeak gero eta pisu handiagoa du guregan. Gure lan baldintzen akordioa, 2007an idatzia, ez da berritu. Garapen Profesionala geldirik dugu berriro. Plantillak gutxieneko adierazpenera doitzen dira, izan ere, greba egiten dugunean, gutxieneko zerbitzuak gara denak.

Argi daukagu, pentsionistak garelako, gutako asko osasun-ahultasun egoeran, eta egunetik egunera gero eta zailtasun handiagoa dugulako osasun-sistemara iristeko. Aurrez-aurreko arreta berreskuratu behar da, eten-digitalarekin amaitu, eta osasun-zentroko langileek Lehen Arreta erreala egin dezaten bideratu, prebenituz eta osasuna sustatuz.

Argi daukagu, emakumeak garelako. Gero eta zailagoa da Osakidetzan ginekologiako prebentzio-azterketak egitea, eta horrek mesede egiten dio osasungintza pribatuari. Mamografietako itxaronzerrendek zaildu egiten dute bularreko minbiziaren prebentzioa, gure osasuna eta bizitza arriskuan jarriz.

Argi daukagu, gurasoak garelako, eta egunetik egunera urrunago joan behar dugulako gure seme-alabak pediatrarenera eramateko, edo ospitaleko larrialdietan amaitu larriak ez diren koadro klinikoekin, hitzorduen atzerapen onartezinak direlako.

ESKn ez dugu zalantzarik, gure tokia kalean dago, borrokan, Osasungintza Publiko sendo eta duina defendatzen. Erabakiak hartzeko gaitasuna, autonomia, aurrekontua eta behar adina langile dituen Lehen Arreta defendatzen. Larunbat honetan, baztertze guztien gainetik, gizarte osoarena den borroka bateratu honetan kaleak beteko ditugu!

 

Euskal Herrian, 2023ko otsailaren 22an.

KALITATEZKO OSASUNGINTZA PUBLIKOA DUEN ETORKIZUNAGATIK. LEHEN ARRETA DEFENDA DEZAGUN!