ESK-k bere indar guztiak jarriko ditu lanean Osasun Saila negoziatzera eta Osakidetzaren arazoei irtenbideak ematera behartuko duen erantzun kolektibo bat eraikitzeko.

 

« ESK-k,  erabakiorra deritzogun borroka honetan parte hartuko duela  iragarri nahi du»

Gaur bilduko dira Osakidetzako mahai sektorialean dauden sindikatuak, Alberto Martinez sailburuak eta haren sailak negoziazio kolektiboaren kontra egindako erasoari aurre egiteko mobilizazioak adosteko.

ESK-k, erabakiorra deritzogun borroka honetan parte hartuko duela iragarri nahi du, sailburuaren jarduerak, faktuz, negoziazio-mahai paraleloak sortzen baititu. Horrek langile guztien batasunak ematen duen indarra galtzera eramaten gaitu, eta Osakidetzaren lan-eskubideen eta egiturazko hobekuntzen arloan hain beharrezkoak diren aurrerapenak lortzea zailtzen du.

 

« indar korrelazioa plantillen alde bideratuko duen  borroka prozesurik gabeko negoziazio kolektiboak  ez du ezertarako balio »

 

Zatiketarik gabe, guztion eskubideen alde borrokatuko duen negoziazio kolektiboaren ereduaren aldeko borrokak, bat egin behar du langileen lan-baldintzak hobetzeko borrokarekin, duela 18 urte baino gehiago iraungitako lan-baldintzen akordioa eguneratzeko borrokarekin, galdutako erosteko ahalmena berreskuratzeko borrokarekin, behin-behinekotasunarekin amaitzeko borrokarekin, pribatizazioekin amaitzeko borrokarekin eta lehen mailako arretari errekurtsoak eta autonomia emanez osasungintza publiko indartsu baten alde egiteko borrokarekin.

ESKrentzat ez dago beste biderik. Azkenaldiko gertaerek erakusten dute ez duela ezertarako balio indar korrelazioa plantillen alde bideratuko duen borroka prozesurik gabeko negoziazio kolektiboak. Horregatik, berriro diogu, ESK-k bere indar guztiak jarriko dituela lanean Osasun Saila negoziatzera eta Osakidetzaren arazoei irtenbideak ematera behartuko duen erantzun kolektibo bat eraikitzeko.

Antolakuntza, Batasuna eta Borroka langile guztien baldintzak hobetzeko!