Tubos Reunidos hartzekodunen konkurtsoan sartu izanak fase berri bat ireki du, eta bertan aktore zaharrei zein berriei gardentasuna, benetako informazioa eta plantilla osoarentzako etorkizun-bermeak eskatzen jarraitu behar dugu.

« Enplegua eta industria-jarduera buru hotzez eta zuhurtziaz defendatu behar dira, baina baita  indarrez, konbentzimenduz eta irmotasunez  ere »

Tubos Reunidoseko (TR) zuzendaritzak borondatezko hartzekodunen konkurtsoa eskatu du. Horrek esan nahi du enpresak berak aitortzen duela kaudimengabezia egoeran dagoela, eta epaitegiaren esku-hartzea eskatzen duela, zorra antolatzen saiatzeko eta irtenbide bat bilatzeko. Egoera oso larria da, hori ukaezina da, baina garrantzitsua da gauza bat ulertzea: hartzekodunen konkurtso batek ez du automatikoki esan nahi enpresa berehala ixtea edo jarduera desagertzea.

Fase berria

Hemendik aurrera fase berri bat irekitzen da. Epaitegiak lehenik konkurtsoa onartu beharko du eta konkurtso-administrazioa izendatu, TRren zuzendaritzatik har daitezkeen erabakiak eta egoera ekonomikoa gainbegiratzeko. Prozesu honetan hainbat agertoki gerta daitezke: zorra birfinantzatzea edo berregituratzea, kitak, inbertitzaile berrien sarrera, industria-berregituraketa, jardueraren jarraipena edo, ez dugu ukatuko, agertoki gogorragoak, irtenbide bideragarririk agertzen ez bada.

Enpresak berak ere jakinarazi du EEEa etenik dagoela soilik, konkurtso-eszenatokiaren barruan, eta prozeduran bertan har daitezkeen erabakien zain. Horrek esan nahi du 240 kaleratzeak, altzairutegiaren itxierak eta logistika kanpora ateratzeak ez direla desagertu, baina ez direla exekutatu edo hasieratik zuzendaritzak nahi bezala onartu ere.

Arazo sakanagoa

Hilabeteetan entzun dugu enplegua suntsitzea zela posible zen irtenbide bakarra. Gaur ikusten dugu enpresak berak aitortzen duela arazoa askoz sakonagoa zela. EEEa martxan dago, baina Tubos Reunidos, hala ere, hartzekodunen konkurtsoan sartu da eta denak pentsarazten du EEEarekin batera paraleloan prestatzen ari zirela; izan ere, hori ez da aste gutxitan prestatzen den zerbait, eta are gutxiago bi hilabete eskaseko greba mugagabe baten erruz.

Horregatik, ESK-tik defendatzen jarraitzen dugu Tubos Reunidosen etorkizuna ez dela kaleratzeetatik, itxieretatik eta kanporatzeetatik pasatzen. Enpresak finantzaketa behar du, zorra berregituratzea, industria-egonkortasuna eta jarduera sendotzeko eta lan-karga bermatzeko benetan gai den kudeaketa.

Greba, piketeak eta mobilizazioa funtsezkoak izan dira

Garrantzitsua iruditzen zaigu beste zerbait gogoratzea ere: plantillak zuzendaritzak nahi zuen moduan EEEa onartu eta sinatu izan balu, gaur konkurtso honi aurre egingo genioke altzairutegiaren itxiera, logistika kanpora ateratzea eta kaleratze guztiak guztiz onartuta eta geuk babestuta, defentsa kolektiborako askoz gaitasun txikiagoarekin, konkurtso-prozesuaren barruan. Hori horrela da, nahiz eta batzuek aitortu nahi ez izan.

Greba, piketeak eta mobilizazioa funtsezkoak izan dira zuzendaritzak bere bide-orria lasai exekutatu ez zezan. Bide-orri horretan plantillaren zati bat engainatu zuten, 263 milioi euroko zorrarekin eta 36 milioi euroko galerarekin, beraien esanetan 41 milioi eurotan baloratutako kalte-ordainak aginduz, EEEari aurpegia garbitzearen truke, ustez borondatezkoak ziren kaleratzeekin. Norbaitek oraindik uste al du noizbait 41 milioi euro horiek ordaintzeko asmorik zutela?

Dena engainu bat izan da, konkurtsoa bai ala bai behar zutelako zorrarekin nahi zutena egiteko eta guztia prestatzeko —zorra eta plantilla— inbertitzaile berrientzat. Horretarako beharrezkoa zen borondatezko konkurtsoa, eta EEE adostua oso onuragarria zen plan makiabeliko horretan; plan horrek zatitu egin gaitu eta dirua, denbora eta osasuna galduarazi dizkigu guztioi.

Baina aurrez aurre borrokan ari zen plantilla aurkitu dute, eta karta hori ez diegu erabiltzen utzi. Eta, hain zuzen ere horregatik, orain inoiz baino garrantzitsuagoa da batasunari eustea eta greba mugagabea indartzea.

Plantilla irmoa datozen aste erabakigarrietan

Datozen asteetan oso erabaki garrantzitsuak har daitezkeelako enpleguaren, altzairutegiaren, logistikaren eta Amurrioko industria-etorkizunaren inguruan. Eta plantilla honek bere burua defendatzeko duen benetako bermea antolakuntza eta borrokarako gaitasuna da.

Greba hiru helburuk sostengatzen dute oraindik: EEEa kentzea, altzairutegiari eustea eta logistika ez kanpora ateratzea.

Grebaren aurkako erasoa areagotu bada, grebak funtzionatzen duelako da.

Gatazkaren etapa berri honetan, aktore zaharrei eta berriei gardentasuna, benetako informazioa eta etorkizun-bermeak eskatzen jarraitu behar da plantilla osoarentzat. Enplegua eta industria-jarduera defendatu behar dira. Eta hori buru hotzez eta zuhurtziaz egitea dagokigu, baina baita indarrez, konbikzioz eta irmotasunez ere.

Ez etsipenik nekeagatik, ez etenik bermerik gabe. BORROKA EZ DA ETEN!