Kursaaleko garbikuntzako greba mugagabea soldata eta lan hobekuntza garrantzitsuekin amaitu da. Langileek % 15,7ko igoera, baimenak eta plusak lortzen dituzte plantilla osoa mobilizatu ondoren.

« Kanpora ateratako eta feminizatutako zerbitzuen  prekarizazioa  egiturazko arazoa da »

Kursaal Kongresu Jauregiko garbitzaileek, ESK sindikatuaren ordezkaritza duenak, azpikontratatutako Servicios Auxiliares de Mantenimiento (Vectalia) enpresako langileak direlarik, greba mugagabea hasi zuten otsailaren 9an.

Atzo, otsailak 12, arratsaldeko lehen orduan amaitu zen Kursaaleko garbitzaileek deitutako greba mugagabea, plantillaren %100ak greba egin duelarik. Greba amaitzeko akordio bat lortu izana langile antolatuek lan-baldintzak hobetzeko egindako presioaren emaitza da.

Ia aldarrikapen guztiak

Oso positibotzat jotzen dugu ia aldarrikapen guztiak lortu izana:

• Soldata-igoerak (%15,7): Aldez aurretik hitzartutako % 1,6ren gainean, % 4ko igoera 2026an; % 4,5ekoa 2027an; eta % 5,6koa 2028an. KPI handiagoa bada, KPI bera aplikatuko da.
  
  
• Parekatze-plusa: Urtean 2.500 euroko plus hori ordainduko den kasuak gehitzea lortzen da, ia kontratazio guztiei ordainduz.
  
  
• Norberaren gauzetarako baimena: egun bateko baimena lortzen da 2026an, 2 egunekoa 2027an eta 3 egunekoa 2028an eta hurrengoetan.
  
  
• Plusak: altuerako eta lorezaintzako lanengatiko eta eskuoihalak eta tapeteak garbitzeagatiko plusak nabarmen handitzea lortzen da.

Hobekuntzak ez dira oparitzen, konkistatu egiten dira

Greba honek sindikalismoaren oinarrizko egia bat erakutsi du berriro: lan-hobekuntzak ez dira oparitzen, konkistatu egiten dira. Negoziazioa blokeatzen denean, patronalak denborak luzatzen dituenean eta langileen bizi-baldintzak gutxiesten dituenean, greba tresnarik eraginkorrena bihurtzen da, eta langile horiek ondo ezagutzen dute, baita 2022an egindako grebaren ondoren ere.

Garbikuntza funtsezko lana da, baina eskubideen aldetik baztergarritzat hartzen da oraindik ere. Profesionaltasuna, prestasuna eta erantzukizuna eskatzen dira, bizitza izugarri garestitzen den testuinguruan duintasunez bizitzeko aukerarik ematen ez duten soldatak eskaintzen diren bitartean. Hori da egiturazko prekarietatearen benetako aurpegia: baldintza onartezinek eutsitako ezinbesteko lanak.

Hobekuntzak langile azpikontratatuentzat eta feminizatuentzat

ESK-k modu positiboan baloratzen du lortutako akordioa, langileentzako hobekuntza zehatza baita. Aldi berean, ohartarazi nahi dugu gatazka honek berriro ere egiturazko arazo bat agerian uzten duela: kanpora ateratako eta feminizatutako zerbitzuen prekarizazioa, non negoziazio kolektiboa sistematikoki ahultzen den eta langileek grebara jo behar izaten duten oinarrizko eskubideak defendatzeko.

Berresten dugu garbitzailerik gabe ez dagoela Kursaalik, eta hiriko eguneroko bizitza eta funtzionamendua mantentzen duten zerbitzuak lan-baldintza duinetan bermatu behar direla.

Beti borrokan, garbiketarik gabe, Kursaalik ez!