Bizkaiko Garbiketa Hitzarmenaren negoziazioa 11 hilabetez negoziatu eta gero, blokeatuta dago. 10.000 langileri eragiten dien hitzarmen honetan murrizketarik ez egotea eta prekaritatetik babesteko balio izatea eskatzen dugu.

« Hitzarmen hau sektoreko gainerako hitzarmenak eraikitzeko  erreferentzia da  »

Bizkaiko Eraikin eta Lokalen Garbiketako Hitzarmen Kolektiboa 11 hilabete daramatza blokeatuta. Ia urtebeteko negoziazioaren ondoren, ez dago aurrerapausorik, eta mahaia erabat trabatuta dago patronalaren (ASELBI-CEBEK eta ASPEL) jarreragatik.

10.000 langile baino gehiago babesten dituen hitzarmena da, gehien-gehienak emakumeak. Gainera, sektoreko gainerako hitzarmenen oinarri eta erreferentzia da. Horregatik, bere arautzea funtsezkoa da jasaten dugun prekaritate estrukturala geldiarazteko.

Funtsezkoa izatetik ikusezina izatera

Pandemian funtsezko jarduera izendatu gintuzten, baina aitorpen hori inoiz ez da eskubideetan edo lan-baldintza duinetan islatu. Errealitatea da sektorea erabat ikusezin eta prekario jarraitzen duela:

• Kale-garbiketarekiko (sektore maskulinizatua eta askoz hobeto ordaindua) soldata-arrakala izugarriarekin.
  
  
• Lanaldi partzial eta barregarriekin, milaka langilek hilabete amaierara iristeko hainbat lanpostu kateatzera behartzen dituztenak.
  
  
• Lan-karga jasanezinekin, gero eta lesio eta osasun-arazo larriagoak eragiten dituztenak.

Hala ere, patronalak negoziaziora proposamen erabat atzerakoiak ekartzen ditu. Ez dute inolako aurrerapenik planteatzen; murrizketak eta eskubide-galerak proposatzen dituzte:

• Baja osagarria kentzea, sektorearen beraren esplotazioak eragiten duen absentismoaren ardura langileei egoziz.
  
  
• Antzinatasun-sistema desegitea, 2026tik aurrera bi bosturtekoetara mugatuz.
  
  
• Soldata-igoera barregarriak ezartzea, erosteko ahalmena galtzea eta pobretze handiagoa eraginez.
  
  
• Hutsetako sistema edo errelebo-kontratuak arautzeko ezezkoa, funtsezkoak direnak partzialtasunarekin borrokatzeko, lan-osasuna bermatzeko eta belaunaldi-erreleboa posible egiteko.

Prekarietatearen aurkako aterkia

ESK sindikatuan argi daukagu: duintasuna ez da beherantz negoziatzen. Bide bakarra aktibazioa, mobilizazioa eta borroka kolektiboa da. Horregatik, gaur, 2025eko abenduaren 4an, Bilbon bildu gara Bizkaiko Garbiketa Hitzarmena prekaritatearen aurrean babestuko gaituen EURITAKOA izan dadin aldarrikatzeko, eta ez prekaritatea areagotzeko tresna.

Murrizketarik gabeko, duina eta bidezkoa den hitzarmen bat eskatzen dugu, eta honako hauek barne hartu behar ditu:

• Erosteko ahalmenaren benetako bermaketa.
  
  
• Hutsetako sistema, partzialtasuna eta behin-behinekotasuna murrizteko.
  
  
• Egungo antzinatasun-sistemaren mantentze osoa.
  
  
• Aldi baterako ezgaitasunen osagarria hobetzea.
  
  
• Erretiro partzialari lotutako errelebo-kontratuaren arautze derrigorrezkoa.

Barruko garbiketak eusten dio Bizkaiari. Guk gabe ez da ezer funtzionatzen. Ordua da patronalak blokeatzeari utzi eta egia onar dezan.