Urtarrilaren 12an Gipuzkoako Metalaren hitzarmen kolektiboa berritzeko mahai sektoriala eratu da. Eguneratzeko eta berritzeko garaia iritsi da.

« Sektoreko enpresak  mozkin errekorrak  lortzen ari dira eta eskaeraz beteta daude »

ESK-n uste dugu aukera historikoa dela sektoreko langileen lan-baldintzak hobetzeko, inflazio handiko eta enpresen onura estratosferikoen testuinguruan. Sektoreko enpresak mozkin errekorrak lortzen ari diren unean eta eskaera-zorroak beteta daudenean negoziatuko da hitzarmen hau.

Aldi berean, ikusten dugu patronalak prekarizatzen jarraitzen duela azpikontratazio handiagoaren eta sektorean behin-behinekotasun handiagoaren bidez. ESK-rentzat, negoziazioan lehentasunezko puntua izango da. Hona hemen gure aldarrikapenen beste oinarrizko puntu batzuk:

• Erosteko ahalmena bermatzea, KPI erreferentziatzat hartuta.

• GEROAren eta mota guztietako BGAEen aurka azaldu gara jada, eta egungo errealitatea kontuan hartuta, GEROAren alderdi atzerakoiak behingoz konpondu behar dira, borondatezko partaidetzarako zein kobratzeko moduetarako formula alternatiboak aurkituz.

• Berdintasun-planak modu eraginkorrean ezartzea eta garatzea. Soldata-arrakalari ez. Aukera-berdintasuna.

• Hitzarmenaren 9. artikulua indargabetzea, gehienez 5 lanaldi izateko aukerari eta enpresak bere aldetik aktibatzeari dagokienez.
  
  
• Benetako lanaldi-murrizketa. Guardietan/erabilgarritasunetan lanaldiak eta plusak arautzea.

Batasun sindikala

Ildo horretan, ESK-k batasunaren aldeko apustua egingo du fronte guztietan, batzarrak egiteari lehentasuna emanez eta langile guztiei hitza eta parte hartzea emanez, protagonismoetatik ihesi, eta langileak kontzientziatuz lan-baldintzak hobetzea patronalarekin aurrez aurre jarrita baino ez dela posible. Araba eta Bizkaiko esperientzia berriek, patronalaren partetik benetako konpromisoak lortzea asko kostatuko zaigula pentsarazten digute.

Lehen negoziazio bilera urtarrilaren 25ean izango da, eta espero dugu mahai sektorialean ordezkaritza duten sindikatuek guk bezain argi izatea. Mahaian egotea eskatuko dugu, nahiz eta botorik ez izan, gure afiliazioari informazio zuzena emateagatik eta langile guztien batasuna bilatzeagatik.