Arabako metalgintzan beste 3 greba egun deitu ditugu irailaren 21, 22 eta 23rako, hitzarmen duin bat lortzeko.

«  Patronalak ekainan  jarrera immobilista eta arduragabea  mantendu zuen, negoziazioa blokeatuz »

Ekainean iragarri bezala, Arabako metalaren sektorea maiatzean hasi ziren greba-dinamikekin jarraitzera deituta dago, sektorean lan egiten duten pertsonen lan-baldintzak duinduko dituen hitzarmen bat lortze aldera.

Ekainean, SEAk bertan behera utzi zuen hilaren 30eko grebaren aurreko bilera, eta Negoziazio Mahaiaren hurrengo bileran, bere jarrera immobilista eta arduragabea mantendu zuen, negoziazioa blokeatuz eta gehiengo sindikalaren proposamena gutxietsiz.

Hala eta guztiz ere, gehiengo sindikala osatzen dugun sindikatuok negoziazioari irailean berriro ekitea proposatu genuen, egoera desblokeatzen saiatzeko, Negoziazio Mahaiaren beste bilera batzuk deituta, eta, horren ondorioz, irailaren 8an bilduko gara.

Arabako metalaren eskaerak

Sektorearen aldarrikapen nagusiak honako hauek dira: KPIari lotutako soldatak, lanaldiaren jaitsiera, behin-behinekotasuna eta malgutasuna mugatzea, laneko osasuna, benetako berdintasuna, aldi baterako ezintasunagatiko osagarriak hobetzea, eta abar.

Eta prezioen igoera orokor baten testuinguruan, non bizitza etengabe handitzen den, garrantzi handia hartzen du erosteko ahalmenari eusteak, langileok gero eta pobreagoak izan ez gaitezen.

« Gure eskubideak eta lan-baldintzak  defendatzea  dagokigu »

Horregatik guztiagatik, espero dugu SEAk gogoeta egitea eta hilaren 8ko negoziazio-mahaira joatea, akordioa erraztuko duen jarrerarekin. Espero dugu sektorean eta maila globalean bizitzen ari garen une historikoaren parean egotea, eta erantzukizunez jokatu dezan. Haien esku dago sektorea geldiaraziko duten beste hiru greba egun saihestea.

Azkenik, Arabako metaleko langileei dei egiten diegu, tailer txikietatik hasi eta enpresa handietaraino, parte har dezaten, greba egin dezaten eta babesa eman diezaieten helburu hori gauzatzeko egingo ditugun ekimenei, hau da, sektoreak behar duen hitzarmena lortze aldera. Antolakuntza eta borroka dira langileriaren tresnarik boteretsuenak, eta gure eskubideak eta lan-baldintzak defendatzeko erabiltzea dagokigu.