Prest Servicios y Manipulados kondenatu dute Joaquín berriz onartzera, kaleratze deuseza delako, eta gainera 600 euroko kalte-ordaina ordaindu behar dute langile horren oinarrizko eskubideak ez errespetatzeagatik.

«  Prest Servicos y Manipulados-ek berehala kaleratu zuen Joaquin bere lan-eskubideak erreklamatzeagatik »

Apirilaren 11n, Prest Servicios y Manipuladosek berehala kaleratu zuen Joaquin, arrazoi bakar batengatik, bere lan-eskubideak erreklamatzea (lan-hitzarmenak agintzen duenaren arabera ordaintzea eskatu zuen).

Erreklamazio hori aurkeztu ondoren, Prest Servicios y Manipulados enpresa era guztietako ekintzak egiten saiatu zen langilea presionatzeko, kaleratu arte.

Prest Servicios y Manipulados guztiagatik zigortuta

Horrela, uztailaren 5ean, kaleratzeari buruzko epaiketa egin zen. Epaiketa horretan onartu da langilea baldintza berberetan berriz hartzea, izapide-aldiko soldatak ordaintzea (kaleratze-egunetik epaia jakinarazi arte jaso ez dituen soldatak), eta enpresa 600 euroko kalte-ordainera kondenatu dute Joaquinen oinarrizko eskubideak ez errespetatzeagatik (langileak ezin du inolako errepresaliarik jasan bere eskubideak eskatzeagatik).

Gainera, epai horretan bertan, langileak benetan jaso behar duen soldata ere aitortzen da, hori baitzen langileak lehen lan-erreklamazioa jarri izanaren arrazoia.

« Kaleratze horren helburu bakarra  askatasun sindikala bertan behera  uztea izan da »

Askatasun sindikala ito

Erabat frogatuta geratu da enpresak kaleratze horretarako zuen helburu bakarra errepresioa eta enpresan askatasun sindikala bertan behera uztea zela.

Prest Servicios y Manipulados enplegu-zentro berezia da (desgaitasuna duten pertsonak kontratatzen ditu), baina Jaz Zubiaurrerentzat zerbitzuak ematen ditu, Eduardo Zubiaurre CONFEBASKeko presidentearena baita (nahiz eta bere kargua aldi baterako utzi duen).

Hau azpikontratazioak sortzen duen prekarietatearen beste adibide bat da, CONFEBASKeko presidenteak kudeatzen dituen enpresak bezalako enpresak praktika horien konplize eta arduradun izan daitezen ahalbidetuz.

ESK sindikatuak berriro ere langileen eskubideak defendatzeko konpromisoa berretsi nahi du eta enpresaren abusuak salatzen jarraituko dugu.

Stop azpikontratazioa.
Lan bera, eskubide berberak!