'Herrien burujabetza eta bizitza duina. Gerra eta kapitalismoaren kontra!' aldarrikatzeko, maiatzaren 9an eta 10ean Euskal Herrian egingo diren mobilizazioetan parte hartzera animatzen ditugu emakumeak.

« Genero-berdintasunaren, lan-eskubideen, indarkeria matxista desagerraraztearen, lurraldeen defentsaren eta justizia sozialaren aldeko borrokan  alternatibak proposatzen ditugu  »

Bost urtetik behin, Emakumeen Mundu Martxaren baitan nazioarteko ekintzak antolatzen dira, emakumeon* (*emakume, trans eta bollera) eta gure lurraldeetan bizi ditugun borroken arteko aliantzak sendotzeko. 2025eko ekintzetarako ardatzak bizitzaren jasangarritasunean eta elikadura burujabetzan oinarritutako ekonomia feminista, indarkeria matxistaren aurkako borroka eta gorputzen burujabetza, enpresa transnazionalen aurrean ondasun komunen defentsa; bakea eta desmilitarizazioa dira.

ESK Euskal Herrian egingo diren mobilizazioen antolakuntzan parte hartzen ari gara. Maiatzaren 9an, Bilbon, lehen mobilizazioa egingo dugu sindikatuok, Bilboko kaleak zeharkatuko dituen manifestazioa, Plaza Eliptikotik Confebaskeraino. Eta maiatzaren 10ean Emakumeen Mundu Martxak proposatutako ibilbidean parte hartuko dugu. Bardean (Nafarroa) hasiko da militarizazioa salatzen, gero Aramaion (Gasteiz) lurraren defentsa biradierazteko, Gernikan (Bizkaia) Guggeiheim bezalako makroproiektuen aurka, Hendaiara (Iparralde) joango da, non Santiago zubian emakumeenganako migrazio politikek nola eragiten duten salatuko dugun, eta azkenik Donostian (Gipuzkoa) egingo den ekitaldi batean azken manifestua irakurriz eta ekainaren 13-14-15ean Marseillan parte hartzeko deia eginez. Hiri honetan mundu osoko emakumeen tailerren eta mobilizazioen topaketa bat egongo da, beste behin ere gerren eta kapitalismoaren aurkako eta herrien subiranotasunaren eta bizitza duinaren aldeko ahotsak sutsuki altxatzeko.

Emakumeen Mundu Martxak bizirik mantentzen du erresistentziaren sugarra, erreferentzia globala da sistema patriarkal, kolonial eta kapitalista salatzeko eta alternatibak proposatzeko genero-berdintasunaren, lan-eskubideen, indarkeria matxista desagerraraztearen, lurraldeen defentsaren eta justizia sozialaren aldeko borrokan. Emakumeak* aurreikusitako mobilizazioetan parte hartzera animatzen ditugu.

Herrien burujabetza eta bizitza duina. Gerra eta kapitalismoaren kontra!