Herritarrak bakarrik botere politiko eta ekonomikoak presionatzeko gai diren une honetan, langile klase osoari eta herritar guztiei dei egiten diegu irailaren 18ko (osteguna) protestetan parte hartzeko.

«  Herritarrak  dira botere politiko eta ekonomikoei presioa egiteko gai diren indar bakarrak »

Urrian, 2 urte beteko dira Israelgo estatuak herri palestinarraren aurkako genozidioaren faserik zorrotzena hasi zuenetik. Ordutik 70.000 pertsona baino gehiago hil ditu Israelgo armadak (nahiz eta ikerketa batzuen kopuruak gora egin 650.000 pertsona arte), gehienak zibilak, milaka haur barne.

Egoera suntsitzaile horren aurrean, nazioarteko komunitatearen gelditasuna eskandalagarria bezain kezkagarria da. Munduko erakunde nagusien pasibotasunak eta interes ekonomikoak lehenesten jarraitzen duten gobernu askoren isilbidezko konplizitateak mobilizatzera behartu ditu munduko herriak. Herritarrak dira botere politikoak eta ekonomikoak presionatzeko gai diren indar bakarrak, genozidioa berehala amaitu dezaten.

Azken asteotan, Palestinako herriarekiko nazioarteko elkartasuna nola hazten ari den ikusi dugu. Espainiako Vueltari boikota edo Global Sumud Flotilla bezalako ekimenak dira olatu honen adibideak. Ekintza horiek erakusten dute elkartasun-mugimendua ez dela geldituko.

Palestinaren aldeko Borroka Egun Globalaren deialdiak

Testuinguru horretan, biharko, irailak 18, Palestinaren aldeko Borroka Egun Globala antolatu da. Data hori aukeratzea ez da kasualitatea: 2024ko irailaren 18an, Nazio Batuen Batzar Nagusiak A/ES-10/L.31 Ebazpena onartu zuen. Ebazpen horretan, Israelgo Estatuari eskatzen zitzaion, argi eta garbi, Palestinako lurraldeen okupazioa 12 hilabeteko epean amaitzeko.

ESK sindikatuak bat egiten du mobilizazio globa honekin, azken hilabeteetan tokiko mailan ere garatzen ari diren beste ekintza asko babestu ditugun bezala. Dei irmoa eta zabala egin nahi diegu langile klase osoari eta Euskal Herriko herritar guztiei, irailaren 18an izango diren ekimen eta mobilizazioetan parte har dezaten.

• Gasteiz:
  • 13:00etan Giza kate zaratatsua Eusko Legebiltzarraren inguruan.
  • 19:00etan Manifestazio zaratatsua Bilbo plazatik.
    
    
• Iruñea:
  • 19:00etan kontzentrazioa Nafarroako Diputazioaren aurrean.
    
    
• Bilbao:
  • 19:00etan manifestazioa Jesusen Bihotza plazatik abiatuta.