TUVISA-ko gerentea kargutik kentzea elkarrizketa-etapa berri bat irekitzeko aukera bat da, negoziazio-blokeoak eta lan-harremanen narriadurak urteak iraun ondoren. Langileen presioa eta gatazka funtsezkoak izan dira aldaketa eskatzen zuen egiturazko arazo bat ikusarazteko.

«  Elkarrizketaren bideak ukatu  zaizkigunean, gatazka eta horren eraginkortasuna balioesten ditugu  »

ESK TUVISA-ko atal sindikalak gure balorazioa adierazi nahi dugu Enpresaren Administrazio Kontseiluak enpresako gerentea kargugabetu berri izanari buruz. Amaitzen den etapa hau akordioen gabezia luze batek, benetako elkarrizketarik ezak eta negoziatzeko borondate eskasak markatu dute; horrek etengabeko blokeo-egoera eragin du bai harreman sindikaletan bai lan-harremanetan.

Egoera honek ez dio inori mesederik egin: ez langileei, ez enpresari, ezta TUVISA-k herritarrei eskaintzen dien zerbitzu publikoari ere. Gaur egungo egoera ez da kasualitatea; zuzenean ondorioztatzen da lan-giro kaskartu batetik, iazko grebara eraman zuena, plantillaren babes bateratuarekin, eta lan-baldintza duinak eta errespetuan eta negoziazioan oinarritutako harreman-esparrua defendatzeko helburuz egindako ekintza sindikaletik.

Benetako elkarrizketa

TUVISA-ko langileek inoiz ez dute gatazka bilatu; aitzitik, beti eskatu dute benetako elkarrizketa-espazio bat, non seriotasunez landu ahal izango liratekeen funtsezko gaiak, hala nola hitzarmen kolektiboaren negoziazioa eta langileen egunerokoari eragiten dioten beste lan-auzi batzuk.

Plantillak eta ordezkaritza sindikalak egindako presio legitimoa erabakigarria izan da aldaketa eskatzen zuen egiturazko arazo bat agerian uzteko. Zentzu horretan, ESK-tik balioa ematen diogu gatazkari eta haren eraginkortasunari, elkarrizketarako bideak ukatu zaizkigunean.

Elkarrizketa- eta negoziazio-giro berria

ESK-n espero dugu enpresaren zuzendaritza berriak elkarrizketa- eta negoziazio-giro bat ezartzeko konpromisoa hartzea, plantillaren lan-baldintzak eta herritarrei eskaintzen zaien zerbitzu publikoa hobetzeko. Norabide-aldaketa bat eskatzen dugu, gatazkak konpontzeko eta lan-baldintzak hobetzeko oinarrizko tresna gisa errespetua eta negoziazioa lehenetsiko dituena.

ESK-ko ordezkaritza sindikala prest dago batzordearekin batera lan egiteko eta zuzendaritza berriari benetako borondatea eskatzeko, plantillari zein herritarrei mesede egingo dieten irtenbideak aurkitzeko; betiere, TUVISA-ko langileen eskubideak eta interesak errespetatzea eta Gasteizko garraio publikoa benetan hobetzeko apustu sendoa egitea oinarri hartuta, horretarako inbertsio nahikoak bermatuz.