Madres Mercedarias Ibarrako langileek 7 eguneko grebarako deialdia egin dute, egoitza-zentroa ixteko mehatxuaren eta zentro horren lan-baldintzen prekarietatearen aurka.

 
Argazkia: Araialdea.eus

« Soldata izoztu ziguten, urteko lanaldia handitu ziguten eta  orain ixteko mehatxua egin digute  »

Orozkoko Madres Mercedarias de Ibarra egoitza-zentroko langileok dibertsitate funtzionalaren sektoreko zerbitzu publiko bat egiten dugu, zehazki, Orozkoko Ibarra auzoan. Gure ordezkaritza sindikala LABeko 2 ordezkarik eta ESK-ko ordezkari batek osatzen dute.

43 langile gara, eta adimen-desgaitasuna duten 73 emakume zaintzen ditugu. Hau da, emakumeak gara emakumeak zaintzen, eta badakigu horregatik ausartzen direla lantokia ixtearekin mehatxatzera eta gure lan-baldintzak hain prekarioak izatera.

900 eta 1.100 euroko soldatak

2019an, Madres Mercedarias-ek, Fundación Aliados enpresa putrea erabiliz, soldatak izoztu ziguten eta urteko lanaldia handitu ziguten. Gure lan-baldintzak defendatzeko borroka hasi genuen eta gaur arte 21 greba egun eta mobilizazio anitz egin ditugu. Bizkaiko Aldundiak beste alde batera begiratu du, aldundia da egiten ari garen zerbitzu publikoaren titularra, eta bera egiten dugu egungo prekarietate-egoeraren zuzeneko erantzule. Gogora ekarri nahi dugu 900 eta 1100 euroko soldatak kobratzen ditugula.

Madre Mercedarias Kongregazioak berriki jakinarazi digu zerbitzua utziko dutela eta, inor ez badator euren negozioa erostera, lantokia itxiko dutela. Bizkaiko Aldundiak erabakia ezagutzen duela ere jakinarazi digute. EDE fundazioa kontratatu dute egungo egoera kudeatzeko. EDE-ren kudeaketa, orain arte, Kongregazioa langileekin edozein negoziaziotatik kentzea izan da, eta langileei jakinaraztea hobe dela zaratarik ez ateratzea; hau da, gu beldurtzen saiatzea eta gure eskubideen alde ez borrokatzea.

Erabiltzaileen etxea

Egoera oso larria da, ez bakarrik guretzat, baita zaintzen ditugun emakumeentzat ere. Emakume horientzat, egoitza-zentro hori beren etxea da. Bizkaiko Aldundia da, orain inoiz baino gehiago, gatazka honen erantzule zuzena, eta zuzenean interpelatuko dugu. Sergio Murillo arduradun gorenarekin bilera bat eskatu dugu, bere erantzukizunak bere gain hartzeko eta egoera honi irtenbidea emateko eskatzeko.

Egoera larri horren aurrean, eta hainbat batzar egin ondoren, 7 greba-egun deitzea erabaki dugu. Otsailaren 6tik 12ra. Eta iragartzen dugu ez direla azkenak izango gure eskubideak errespetatzen ez badira: gure enpleguak mantentzea, erosteko ahalmena berreskuratzea eta gure urteko lanaldia murriztea.

Mobilizazioak

Greba-egunetan hainbat mobilizazio eta ekintza egingo ditugu, besteak beste:

• Orozkoko Ibarrako lantokian egunero 14:30 elkarteratzeak.
  
  
• Manifestazioa, Bilbon, otsailaren 8an. Manifestazioa 10:00etan aterako da EDE Fundazioaren egoitzatik, eta Moyua plazan batuko da Aldundiaren Jauregiraino, borrokan ari diren sektore bereko beste enpresa batzuekin batera, hala nola Gorabide eta Gaude.

Amaitzeko, gizarte osoa gonbidatu nahi dugu gure borroka babestera, eta, era berean, gure erabakia helarazi nahi dugu, gure enpleguak eta lan-baldintzak bermatuak izan daitezen lortu arte behar den guztia borrokatzen jarraitzeko.

Mercedarias Ibarrako Enpresa batzordea