ESK-k Osakidetzari exijitzen dio 2024ko ekainaren 30etik egiteke dauden Kontratazio Zerrenden eguneraketa eta integrazioa berehala egitea. 2024ko uztailaren 11n, Osakidetzak iragarri zuen “laster” eguneratuko zirela kontratazio-zerrendak, eta horietan sartuko zirela etete-egunera arte izena eman zuten pertsonak. Gaur egun, Osakidetzak zerrendak eguneratu gabe jarraitzen du.

Kontratazio Zerrenden kudeaketa ez da inoiz Osakidetzaren gotorlekua izan, baina sistema informatikoen kudeaketa 800.000€ko kostuarekin pribatizatu eta Deloitte multinazionalaren esku utzi zirenetik –kontratuak manipulatzeagatik isuna jaso zuen multinazionalak–, zerrendak eskuragarriak eta gardenak izateari utzi diote, dinamismoa galdu dute eta ziurgabetasunean murgildu dira milaka kide eta hautagai.

Osakidetzan, urtean bi aldiz egin behar dira eguneratzeak, eta orain 7 hilabete daramatzagu ekainaren 30etik itxaroten, hura izan baita azken mozketa-data. Gainera, atzeratu egin da haietan izena eman duten langileak sartzea. Aurreko eguneraketa ere urte erdi baino gehiago atzeratu zen eta akatsez betetako zerrenda bat argitaratu zuten, gerora zuzenketa bat argitaratu behar izateraino.

Gainera, mugikorretarako aplikazioak, zeinetan partaideek zerrendan duten posizioa egiaztatzen duten, hilabeteak eman ditu funtzionatu gabe, aplikaziora sartzea eragotziz, baita aukeratutako destinoak gaizki islatuz ere. Kontratazio zerbitzuetako langileek ere arazoak dituzte beren sistemetan ikusteko zer pertsona dauden eskuragarri, eta ezin da bermatu zerrenden araberako kontrataziorik.

Gainera, aukeratuta dituzten destinoetan aldaketak egitea erabakitzen duten pertsonek urtebete baino gehiago itxaron dezakete hauek gauzatu arte. Destino berriak ez dira baliagarriak zerrendak eguneratu arte, egun gutxi batzuetan zerrenda zaharretatik kentzen zaituzten bitartean, lan egiteko aukera murriztuz. Osakidetzak berehala arindu eta modernizatu behar du prozesu hau. Badira destinoak azkarrago aldatzeko aukera ematen duten osasun- sistemak.

Osakidetzaren estilora, inork ez du erantzuten, inork ez du informaziorik ematen, inork ez du erantzukizunik hartzen. Ez da gertatzen ari denaren azalpen bakar bat ere eman. Osakidetzak ez du inolako errespeturik erakusten kontratazio-zerrendak osatzen dituzten pertsonekiko, ezta zerrendak osatzeko hautagaiekiko ere, horiek baitira Osakidetzaren oinarri. Osakidetzako langileen % 40-50 behin-behineko eta bitarteko langileek osatzen dute, eta kontratazio-zerrendek ondo funtzionatzearen ondorio da haien oinarri ekonomikoa.

ESK-k argi dauka aldi baterako kontratazio eredua aldatu behar dela, kategoria guztietako hautagaiekiko errespetua, gardentasuna eta bizkortasuna bermatzeko. Osakidetzak aurpegia eman behar du, atzerapen hau zeri zor zaion azaldu, kontratazio zerrendak berehala eguneratu eta integratu eta bere kudeaketaren pribatizazioa itzuli.

ESK-k ez du egoera hau onartuko eta horregatik borrokan jarraituko dugu gure eskubide guztiak bermatu daitezen.