ESK-k bere babesa adierazten dio Psikologia Klinikoko Euskal Elkarteari, eta Osakidetzari exijitzen dio osasun mentalean arreta benetan indartu nahi badu, txapuzarik gabe eta legea betez egin dezala.

Osakidetzari exijitzen diogu Psikologoak kontrata ditzala Psikologia Klinikoko espezialitatearekin, horixe eskatzen baita OSNn zerbitzuak emateko.

Hemen daukazue Psikologia Klinikoaren Euskal Elkartea argitaratu duen prentsa oharra

Osakidetzak iragarritako psikologo ez espezialisten kontratazioak legea urratzen duela salatu du Psikologia Klinikoaren Euskal Elkarteak

• Osasun Publikoari buruzko urriaren 4ko 33/2011 Lege Orokorraren arabera, lehen mailako arretan eta arreta espezializatuan lan egiten duten psikologoek Psikologia Klinikoko Psikologo Espezialistaren titulu ofiziala izan behar dute.

• Eusko Jaurlaritzako Osasun Sailak Lehen Mailako Arretako osasun zentroetan espezialistak ez diren psikologoak sartzea aurreikusten duen
proiektu pilotua iragarri du.

• Errioxako Osasun Zerbitzua auzitara eraman zuten eta 2024ko urtarrilean kondenatua izan zen arrazoi beragatik, Espainiako Psikologia Klinikoko
Elkartearen (SPEC) aldeko epaian lehen mailako arretako psikologoei eskatutako titulazioari buruzko legea ez betetzeagatik.

Aste honetan, Eusko Jaurlaritzako Osasun Sailak iragarri du 13 psikologo sartuko direla Lehen Mailako Arretako osasun-zentroetan, Osakidetzako iturrien arabera, “pertsonen ongizate emozionalean laguntzeko eta osasun mentaleko nahasmendu larriagoak prebenitzen saiatzeko”.

Osakidetzan osasun mentalean baliabideak zabaltzeko beharra agerikoa da, baina hedapen hori ezin da edozein preziotan egin. Aditzera eman den bezala,
espezialistak ez diren psikologoak kontratatuko dira, legea urratuz. Egungo legediaren arabera (Osasun Publikoari buruzko urriaren 4ko 33/2011 Lege Orokorra), Osasun Sistema Nazionalean lan egiten duten psikologoek Psikologia Klinikoko Psikologo Espezialistaren titulu ofiziala izan behar dute. Sistema
publikoan Osasun Prestakuntza Espezializatuan (BAPE, BAME) lau urte eman dituzten profesionalak dira. Aitzitik, Osakidetzak unibertsitateko graduatuak
hartzea proposatzen du, baldintza bakar batekin: unibertsitateko master bat egin izana (Osasun Psikologia Orokorreko Masterra), ´kudeatzaile emozionalak´,
´komunitate-psikologoak´ edo ´ongizate emozionaleko teknikariak´ izenpean.

Osakidetzaren jokabideak harritu egiten gaitu, aurrekariak kontuan izanda. Psikologia Klinikoko Espainiako Elkartearen (SPEC) aldeko epaian, Errioxako
Osasun Zerbitzua auzitara eraman eta 2024ko urtarrilean kondenatua izan zen, Lehen Mailako Arretan psikologoei eskatzen zaien titulazioari buruzko Legea
hausteagatik. Inork ez luke onartuko traumatologiako kontsulta batean dagokion espezialitaterik ez duen profesional batek artatzea. Hala ere, osasun mentalean, irtenbide inprobisatuak planteatzen ari dira, prestakuntza espezifikorik ez duten figurak eta diagnostiko klinikoei heltzeko gaitasunak kontuan hartzen dituztenak.

Osasungintzako profesionalen eskasia errealitate bat da, baina pediatra lanetan jarduteko mediku jeneralista graduatu berriak sartzea aurreikusten ez den bezala, ez litzateke aurreikusi behar osasun mentaleko espezialistak ez direnak sartzea.

Osasun mentalean esku-hartzea konplexua da, eta bere forma arinenetan ere, ezagutza kliniko sendoak eskatzen ditu. Prestakuntza generikoa eta borondate ona
ez dira nahikoak pertsonekin lan egiteko. Buruko osasunak adabakia baino zerbait gehiago eskatzen du.