Euskadiko Kontratuen inguruko Errekurtsoen Administrazio Organoak (KEAO) kautelazko neurriak hartu eta lizitazioa geldiarazi du, aurkeztutako errekurtsoak (ESK-rena barne) ebatzi bitartean.

«  Kalitatezko zerbitzu publikoak , lan-baldintza duinak eta herritar guztien baliabideen erabilera arduratsua defendatzearen aldeko apustua egiten dugu »

 

Euskadiko Kontratuen inguruko Errekurtsoen Administrazio Organoak (KEAO) ESK-ri arrazoia eman dio, eta kautelazko neurriak hartzea eta Eusko Jaurlaritzak Larrialdiko Osasun Garraioaren Sarearen (RTSU) eta Larrialdikoa ez den Osasun Garraioaren (TSNU) kudeaketa pribaturako prestatu dituen pleguak geldiaraztea erabaki du, ESK sindikatuak, beste erakunde batzuek bezala, aurkeztutako errekurtsoen ondoren.

ESK-k erabaki hau zerbitzu publiko honen publifikazioaren alde lanean eta borrokan jarraitzeko urrats garrantzitsutzat jotzen du, baita baliabide publikoen kudeaketa eraginkorragoa eta arduratsuagoa defendatzeko ere.

Gogoratu behar da Eusko Jaurlaritzak planteatutako lizitazioak 1.600 milioi eurotik gorako aurrekontua zuela. ESK-k aurkeztutako errekurtsoan agerian utzi zuen kudeaketa pribatua kudeaketa publikoa baino garestiagoa dela. Horrenbestez, plegu horiekin aurrera egiteak kalte handia eragingo lieke diru-kutxa publikoei.

 

Langileen baldintzen eta zerbitzuaren prekarizazioa

ESK-k, gainera, salatzen du osasun-garraioaren kudeaketa pribatuaren eredua, neurri handi batean, langileen lan-baldintzen prekarizazioan oinarritzen dela, eta, aldi berean, herritarrek merezi duten osasun-arretaren kalitateari eragin negatiboa egiten diola.

ESK-ren ustez, osasun-garraioa bezalako funtsezko zerbitzu publiko bat administrazio publikoek zuzenean kudeatu behar dute, eta langile publikoekin eman behar da, lan-baldintza duinak, egonkortasuna eta kalitatezko arreta bermatzeko.

KEAO-en erabakiak, beraz, pribatizazio-eredu bat zalantzan jartzeko beste urrats bat dakar. ESK-ren ustez, eredu hori garestiagoa, prekarioagoa eta langileentzat zein herritarrentzat berme gutxiagokoa da.

 

 

Inpugnatzen jarraituko dugu

ESK-k eskura dituen bide eta esparru guztiak erabiltzen jarraituko du eredu hau inpugnatzeko eta osasun-garraioaren publifikazioa defendatzeko, funtsezko zerbitzu publikoak langile publikoekin eman behar direla eta ez azpikontratatutako enpresen bidez ulertzen baitugu.

ESK-k lanean jarraituko du kalitatezko zerbitzu publikoak, lan-baldintza duinak eta herritar guztien baliabideen erabilera arduratsua defendatzeko.