Langile baten intimitatea ez errespetatzeagatik zigortu dute Osakidetza, datu sentikorren babesa ez bermatzeagatik. Barne-ikerketa bat eta Osakidetzak erantzukizunak bere gain hartzea eskatzen dugu.

« Epai honek  atzera bota du Osakidetzaren errekurtsoa , bere akatsa onartzeari uko egin baitio »

Denok ulertzen dugu eta badakigu administrazio publikoek kontrola behar dutela gure datuak euskarri desberdinetan bildu eta babesteko, batez ere euskarri informatikoan, eta batez ere Osakidetza bezalako administrazio batean.

Intimitatearen urraketa Osakidetzan

Hala ere, ESK-k jakin du Osakidetzaren hainbat jardueren ondorioz langile baten intimitatearen aurkako oinarrizko eskubidea urratu duen epai bat eman duela EAEANk.

Gertakariak 2019ko ekainean izan ziren. Orduan, langile horrek Datuak Babesteko Euskal Bulegoan salatu zuen bere erakundeko Gatazkak Konpontzeko Batzordean idazki bat aurkeztu zuela, eta idazki hori hirugarren inplikatu bati eman zitzaiola, haren berri eta baimenik gabe eta legezko gaikuntzarik gabe. Izan ere, idazki horren berri ere eman zitzaion GSINri, langilearen baimenik gabe. Honen ondorioz Osakidetza, Euskal Osasun Zerbitzuak Datuak Babesteko Erregelamendu Orokorra urratzeagatik zigortua izan zen, arau-hauste larri bat egiteagatik.

Jarduera horrek agerian uzten du Osakidetzak ez duela inolako interesik bere profesionalen artean sor daitezkeen gatazkak konpontzeko, ezta bere gain hartu dituen tresnak modu egokian erabiltzeko ere; Gatazkak Konpontzeko Batzorde batek, pertsonen interesak babesteko pentsatua dagoena, bere txostenak hirugarrenei filtratu diezazkiela ikusi da.

Barne-ikerketarik gabe

Osakidetzak, bere falta aitortu, erantzukizunak bere gain hartu, barne-ikerketa bat hasi eta horrelakorik berriro gerta ez dadin mekanismo egokiak antolatu beharrean, zehapen horren aurkako errekurtsoa jarri du, eta errekurtso hori hasieran aipatu den epaiarekin amaitu da.

ESKren ustez, gertakari hauek oso larriak dira, barne-gatazka baten ikerketa-prozesu baten parte den dokumentazioa ezin da eskuz esku pasatu; Osakidetzak bere erantzukizunak bere gain har ditzala eskatzen dugu, barne-ikerketa bat egin dezala, langilearen idazkia hirugarrenei nork eta zergatik eman zitzaien argitzeko eta horrelakorik berriro gerta ez dadin behar diren neurriak hartzeko.