ESK-k langile klasea zoriondu besterik ezin du egin. Beste behin ere milaka pertsona kalera atera dira eta eztabaida sozial eta politikoaren erdigunean benetan axola duena jarri dute: langileen beharrak.

« Eusko Jaurlaritzari eta Nafarroako Gobernuari dagokie egun honetako  aldarrikapenak jasotzea  »

Gaur Euskal Herrian ikusi ditugun mobilizazio handien ondoren, ESK-k langile klasea zoriondu besterik ezin du egin. Beste behin ere milaka pertsona kalera atera dira eta eztabaida sozial eta politikoaren erdigunean benetan axola duena jarri dute: langileen beharrak.

Langile klasearen pobretzea, militarizazioa eta gerra ekonomia salatzeak eta Euskal Herrirako LGS propio bat aldarrikatzeak kaleak bete dituzte, beste behin ere herri honek mobilizaziorako gaitasuna duela eta hau ez dela ez nahi ezta behar dugun eredua erakutsiz.

Goizean zehar, gaur arratsaldean bezala, milaka lagunek, lau hiriburuetan, eta herri eta eskualde ezberdinetako ehunka mobilizaziok oso argi utzi dute ez dutela onartzen inposatzen diguten eredua, ezta Iruña eta Gasteizko gobernuen erabaki antidemokratikoak ere. Baina ez hori bakarrik, gaur agerian geratu da langileak prest daudela beren eskubideen alde borrokatzen jarraitzeko, oztopoak oztopo.

ESK-k uste du gaurko mezua oso argia izan dela langile klasearen aldetik, eta orain Eusko Jaurlaritzari eta Nafarroako Gobernuari dagokiela egun honetako aldarrikapenak jasotzea.

Ertzaintzak ESK-ko afiliatu bat atxilotu du gaur goizean Bilbon. Berehala askatzea eskatzen dugu. Eusko Jaurlaritzak herritarren parte-hartzearen alde egin beharko luke, errepresioaren alde egin beharrean. Horren adibide da Eusko Legebiltzarrean Lanbide Arteko Gutxieneko Soldata propio baten aldeko LHE-aren blokeoa.